返回列表 回復 發帖

2019-06-16 易呷醋女友

《對付易呷醋女友嘅方法》
對男人嚟講,應該冇嘢慘得過有個易呷醋嘅女朋友。

你身邊所有女性朋友都係佢嘅敵人,靚嗰啲係頭號唔使講啦!
如果你話:「我一個女性朋友都冇㗎!」以為咁冇事?真係少年太年輕了,女朋友仍然會覺得你有,有個女仔行過你唔小心望咗一眼,佢都可以自製假想能延續故事⋯⋯你又激嬲咗佢了。

初時我都會好聲好氣解釋:「朋友嚟,一啲都唔熟,真係冇嘢㗎⋯⋯」佢會話:「咁你Unfriend佢吖!唔准再有任何聯絡。」
「吓⋯⋯無啦啦unfriend人好怪啫⋯⋯唔好啦,你信我啦。」我再試圖解釋。

日復日,原來我嘅好聲好氣,只會助長女朋友嘅「醋底」,於是我嘗試一個好有效嘅新方法⋯⋯
唔係迫於無奈,我都唔出此下策,女朋友嘅佔有慾好強,就算我同女仔傾一句偈,佢都覺得我同佢有嘢咁。喂,你身邊都有男同事,以前都有啲男性朋友啦,公平咩?

於是,我霸氣咁話:「咁你都即刻Del晒啲男性朋友佢囉。」諗住留名等佢解釋,然後我就可以直入中路:「嗱,妳咪又係咁,叫人Del自己就唔Del,雙重標準!」
點知佢將部電話一嘢扔過嚟,好彩唔係Nokia啫,唔係頭都穿,然後佢比我更霸氣咁話:「隨便Del。我好公平嘅。」

Round 1我戰敗。
但我真係忍唔到,有時同班兄弟吹下水講下女,佢見到人哋Send啲性感相畀我都發晒嬲。使唔使咁嚴重呀⋯⋯男人唔係講錢,就講女㗎啦,我哋嘅世界好細㗎咋,同埋都係得把口啫⋯⋯

於是我諗起,孫子兵法有一招叫以退為進,女人好易冇安全感,同時亦都好易信任你,所以我決定唔同佢起晒鋼,退一步海闊天空,男人能屈能伸,佢話Unfriend我就unfriend幾個,佢唔畀我同女仔傾偈我就唔傾⋯⋯

一個星期之後,佢同我講:「係咪好委屈你?我好似太過份?」我就知道,時候到喇,可以講晒心入面嘅感受出嚟:「係!點解妳成日都要咁大疑心?其實真係好煩,我想好哋哋同妳拍拖都唔得!⋯⋯夠喇!我受夠!!!」
從此,佢就好信任我,冇再懷疑我了⋯⋯⋯⋯你就想!童話故事咩?

現實係,佢依然好易呷醋,之不過我由佢呷,唔再解釋咁多,佢呷呷下,好似免咗役咁,我好似啲高官咁錄音機式回答:「我同佢真係冇嘢」、「我同佢真係冇嘢」、「我同佢真係冇嘢。」而佢又好似大部份香港人咁,任何幾嬲嘅事,幾日後,都會不了了之。
返回列表